---
title: "Papilio machaon"
url: https://ocbribadeo.org/papilio-machaon/
date: 2025-01-25
modified: 2025-01-25
lang: es
author: "OCB Ribadeo"
description: "(Entrada en galego, o traductor a outros idiomas non sempre traduce correctamente) Clasificación Taxonómica Reino: Animalia; Filo: Arthropoda; Clase: Insecta; Orden: Lepidoptera; Familia: Papilionidae; Género: Papilio; Especie: Papilio machaon Rareza..."
categories:
  - "A nosa biodiversidade"
tags:
  - "A nosa biodiversidade"
image: https://ocbribadeo.org/wp-content/uploads/machaon-papilio-scaled.jpg
word_count: 447
---

# Papilio machaon

(Entrada en galego, o traductor a outros idiomas non sempre traduce correctamente)

**Clasificación Taxonómica**

**Reino**: Animalia; **Filo**: Arthropoda; **Clase**: Insecta; **Orden**: Lepidoptera; **Familia**: Papilionidae; **Género**: Papilio; **Especie**: *Papilio machaon*

Rareza da especie        habitual Mundial

Estatus da especie       nativo Mundial      nativo España

![](https://ocbribadeo.org/wp-content/uploads/machaon.jpg)

O *Papilio machaon* está clasificado pola Unión Internacional para a Conservación da Natureza (UICN) como de Preocupación Menor (LC) a nivel global. Con todo, o seu estado de conservación pode variar significativamente segundo a rexión. Factores como a perda de hábitat debido á urbanización e a agricultura intensiva, o uso de pesticidas que afectan tanto as larvas como aos adultos, e o coleccionismo excesivo pola súa beleza, representan ameazas para a especie nalgunhas áreas.

O  *Papilio machaon* é unha das bolboretas máis grandes de Europa, cunha envergadura de ás que oscila entre 65 e 90 mm, o que a fai inconfundible polo seu tamaño e colorido. O seu voo combina un movemento potente con planeos, sendo fácil de recoñecer mesmo a distancia.

A oruga aliméntase principalmente de fiúncho, ruda e cenoria silvestre, aínda que tamén pode consumir outras plantas da familia Apiaceae. En localidades como Ribadeo, é común atopar estas orugas en plantas de fiúncho, onde realizan o seu desenvolvemento. A medida que crecen, as orugas cambian de cor e deseño con cada muda de pel, mostrando patróns máis rechamantes na súa etapa final. En apenas quince días son capaces de multiplicar o seu peso por máis de mil.

![](https://ocbribadeo.org/wp-content/uploads/orugapapiliomachaon.jpg)

Un dos hábitos máis curiosos dos machos é o hilltopping, un comportamento típico de moitas bolboretas da familia Papilionidae. Os machos voan cara á cima de outeiros ou áreas elevadas, onde esperan a chegada de femias. Este comportamento facilita o encontro entre individuos, especialmente en lugares onde as poboacións están dispersas.

Durante a noite ou en períodos de inactividade, dorme coas ás pechadas e permanece inmóbil. Con todo, ao detectar unha perturbación, abrirá as súas ás de golpe, posiblemente como unha estratexia para asustar aos depredadores.

![](https://ocbribadeo.org/wp-content/uploads/papiliomachaon.jpg)

O *Papilio machaon* ten unha distribución moi ampla, abarcando gran parte de Europa, Asia e América do Norte. A súa adaptabilidade a diferentes hábitats e climas contribúe ao seu éxito como especie. Con todo, en áreas onde os hábitats naturais foron severamente alterados, as súas poboacións poden verse afectadas.

**En Ribadeo podemos velas de marzo a outubro.**

Mapa de presenza en observation.org:

![](https://ocbribadeo.org/wp-content/uploads/mapadepresenciapapiliomachaon.png)

E xa para rematar, un video da emerxencia dunha *Papilio machaon*, grabado en Ribadeo. Unha oruga rescatatada nun prado de Obe, xunto con outras cinco, antes de ser pilladas por un tractor que estaba roturando, das cales se estaba a facer un seguimento. Criadas na casa con fiúncho, voaron libres na zona. Unha experiencia inolvidable.

[https://ocbribadeo.org/wp-content/uploads/CHISPI.mp4](https://ocbribadeo.org/wp-content/uploads/CHISPI.mp4)